(ኢ.ፕ.ድ) Ethiopian press agency

በኢትዮጵያ ራሱን የቻለ አገር አቀፍ የመሬት አጠቃቀም ፖሊሲ አለመኖሩ በግብርና ስራ፣ በምግብ ዋስትና በምርታማነት እና ተያያዥ ጉዳዩች ጉዳት እያደረሰ እንደሚገኝ በዘርፉ የተካሄደ ጥናት አመለከተ፡፡

‹‹የኢትዮጵያ የመሬት ፖሊሲ ዝግጅትና አተገባበር›› በሚል ርዕስ ላንድ ፎር ላይፍ ኢትዮጵያ ያሰራው ጥናት እንዳመለከተው፤ ባለፉት የመንግስት ስርዓቶች በተሰሩ የፖሊሲ ስሪቶች ከፖሊሲ አወጣጥ ጀምሮ በአተገባበርና በአፈጻጸም ክፍተት ያለበት ሆኖ ተገኝቷል፡፡

የጥናት ቡድን መሪ የሆኑትና በአዲስ አበባ ዩኒቨርሲቲ የአገር ልማት ኮሌጅ መምህር ዶክተር መሳይ ሙሉጌታ የፖሊሲ ስሪቱ የተማከለ እንደነበር፣ ህብረተሰብን በበቂ ሁኔታ ያላሳተፈ፣ ህዝብን ያላማከለ፣ ህጎቹ የተበታተኑና ላተገባበር የማይመቹ ሆነው በጥናቱ መለየቱን አመልክተዋል፡፡
በመሆኑም ወጥ የሆነ የመሬት ፖሊሲ እንደሚያስፈልግ ነው የጠቆሙት፡፡

በርካታ ፖሊሲዎች፣ አዋጆችና እስትራቴጂ ሰነዶች እያሉ እስካሁን ድረስ የአካባቢ ጉዳይ፣ የምግብ ዋስትና፣ የእርሻ ስራና ምርታማነት አስቸጋሪ ሆኖ የቀጠለው አሰራሩ የህዝብን ችግር ግምት ውስጥ ያላስገባ በመሆኑ ነው ብለዋል፡፡

በኢትዮጵያ ራሱን ችሎ የተዘጋጀ የመሬት አጠቃቀም ፖሊሲ የለም፡፡ የመሬት ፖሊሲ የሚገኘው ተበታትኖ በተለያየ ቦታ ነው፡፡ ህጎቹ የሚገኙት በተበታተነ መንገድ በአዋጆች፣ በህገ መንግስቱ፣ በፕሮግራምና በተለያየ አንቀጾች ነው፡፡
በመሆኑም ራሱን የቻለ ‹‹የኢትዮጵያ የመሬት አጠቃቀም ፖሊሲ ሰነድ ያስፈልጋል›› ብለዋል፡፡

በዘላለም ግዛው

Leave a Reply

Your email address will not be published. Required fields are marked *